Urak azkar bete ditu ustiapen hauek, beren hondo iragazgaitzak direla eta, eta horrela hainbat laku eta urmael sortu dira, hedadura eta sakonera desberdinetakoak. Laku hauen artean, beren hedaduragatik, Zugaztietaren ingurukoak nabarmentzen dira bereziki, Sopuerta, Galdames eta Abanto-Zierbena udalerrietan kokatutako beste batzuekin batera. Burdinaren ustiapenaren ondorioz mendeetan zehar sortu diren paisaia hauek Euskal Herriko "Las Médulas" deituak izan dira batzuetan, eta Euskal Herriko paisaiako elementu paregabeak dira. Guztiz beharrezkotzat jotzen dugu paisaia hauen babes legala, beren hondatze eta galera eragozteko.